Ae Zindagi... Thoda dheeme chal, thoda jeene de !

Jab main chota tha, shayad duniya bahut badi hua karti thi…
Mujhe yaad hai mere ghar se school tak ka woh raasta,
Kya kya nahi tha wahan,
Chaat ke thele, Jalebi ki dukaan,
Barf ke gole, sab kuch…

Ab wahan, mobile shop, video parlour hain,
Phir bhi sab soona hai,
Shayad ab duniya simat si rahi hai...

Jab main chota tha shayad shaamein bahut lambi hua karti thi…
Main haath mein patang ki dor liye ghanto udaya karta tha,
Woh lambi cycle race, woh bachpan ke khel,
Woh har shaam thakk kar choor ho jana…

Ab shaam nahi hoti, Din dalta hai aur sidhe raat ho jaati hai,
Shayad waqt simat sa raha hai…

Jab main chota tha shayad dosti bahut gehri hua karti thi…
Din bhar woh hujoom banaakar khelna,
Woh doston ke ghar ka khana,
Woh ladkiyon ki baatein, woh saath mein rona…

Ab bhi kai dost hain par dosti jaane kahan hai,
Jab bhi traffic signal par milte hain, “Hi” ho jaati hai,
Aur apne apne raaste chal dete hain,
Holi, Diwali, New Year par SMS aa jaate hain,
Shayad ab rishte badal rahe hain…

Jab main chota tha khel bhi ajeeb hua karte the…
Chhupan-chhupai, langdi-taang, tippi-tippi-top,
Aur ab internet , office se fursat hi nahi milti,
Shayad zindagi badal rahi hai…

Zindagi ka sabse bada sach yahi hai,
Jo aksar kabristan ke baahar board par likha hota hai:
Manzil to yahin thi bas zindagi guzar gayi meri yahan aate aate…

Zindagi ka lamha bahut chota sa hai…
Kal ki koi buniyaad nahi hai aur aane wala kal sirf sapno mein hai...

Ab bachh gaye iss pal mein,
Tamannao se bhari iss zindagi mein hum sirf bhaag rahe hain...

Yaar, thoda raftaar dheeme karo...
Aur iss zindagi ko jiyo… khoob jiyo mere yaar.